Guztira 54 taldek eta 200 bat lagunek hartuko dute parte aurtengo txapelketan, inoizko parte hartzerik handiena dela nabarmendu dute antolatzaileek.

Ekainaren 19an eta 20an jokatuko dute Urretxun 3x3 saskibaloi modalitateko 9. San Joan txapelketa. Gernikako Arbola plazan izango dira partidak, bost maila bereizita: benjaminak, alebinak, infantilak, kadete-juniorrak eta seniorrak. Aurten berrikuntza bat ere badakar txapelketak, bejamin eta alebin kategorietan hiruko saskiratze txapelketak jokatuko dira.

Gaur 17:00etatik 20:00etara jokatuko dituzte partidak benjamin eta alebin mailan. Parte hartzea 50 xentimo kostatuko da eta irabazleek garaikurra eta bildutako dirua eskuratuko dute.

Bihar goizean infantilen txanda izango da. 10:00etan hasi eta 13:00 bitartean arituko dira. Junior eta seniorren txanda arratsaldean izango da, 16:00etatik 20:30era. Partidu tarteetan hiruko saskiratze txapelketak jokatuko dira. Parte hartzea euro bat kostako da eta irabazleek garaikurra eta bildutako dirua eskuratuko dute.

Partidu guztiak Gernikako Arbola plazan jokatuko dira.

Argazkian: pasa den urteko txapelketako une bat.