Elurpean egin behar izan zuten igandean ibilbidea mendizaleek. Lau lagun aritu ziren gainontzekoentzat bidea irekitzen. Hauen lana eskertu dute antolatzaileek.
Berrogeita hamabost lagun elkartu ziren igande goizean Goierriko Biraren 2. etapa gauzatzeko asmotan.
Goizeko 8:30ak aldera iritsi ziren
Udana gainera elurra ari zuela. Igoera pixkanaka egin eta Jandoain
sarobetik igarota gelditu zen elurra. Handik Biozkornia lepoan
barrena egin zuten mendizaleek eta handik Artzanburu aldera jo
zuten.
Puntatik behera gidari lanak egin zituzten lau lagunek, GPS-a eskuan. Laino oso itxia agertu zen hainbat momentutan eta GPSaren laguntza beharrekoa izan zuten. Elur-erraketak zituzten soinean eta lan handia eginda gainontzekoentzako bidea ireki zuten Lizarrate-San Adrianera ia iritsi arte.
Antolatzaileek biziki eskertu nahi izan dute lau lagun hauek egindako lana. Hauen laguntzarik gabe ibilbidea egitea ezinezkoa izango bailitzateke esan dutenez.
Handik Aizkorritxo gainera iritsi
eta handik Arbelarreko txaboletara joanda hamaiketakoa egin zuten
indar berritzeko. Arbelarretik Oltzarako bidean sartu ziren basoan,
handik bidea segi eta Oltzako txaboletaraino iristeko. Bidea segi eta
azkenik, elurrak erabat estalita zuen galtzadan ibiliz, tuneletik
pasatu gara. Tuneletik, Mikeleten etxea igarota iritsi ziren azkenean
helmugara, Otzaurtera. Guztira bederatzi ordu eta erdi behar izan
zituzten bidea guztiz osatzeko.
Hirugarrena, hilaren 14an
Hirugarren ekinaldia otsailaren 14an izango da. Orduan bete beharreako ibilbidea hokoa izango da: Otzaurte - Etxegarate – Areetza (983 m) - Intsusburu (943 m) – Irumugarrieta (960 m) eta Lizarrusti.
Dagoeneko irekita dago izena emateko epea. Izenematea erraztearren, Ostadarren egoitzan (Zelai Ariztin) eman ahal izango da izena astearte, ostegun eta ostiralean 20:00etatik 21:00etara. Baita Goierri mendi taldearen tabernan ere. Izena emateko azken eguna otsailaren 12a izango da. Informazio gehiagorako, Goierriren eta Ostadarren web orriak bisitatu daitezke.
Egilea: Ostadar M.T.
