Zumarragako Piedad eta Bidezar kaleetan ari dira lur azpiko edukiontziak egiten, azken asteetan egiten ari diren urbanizatze lanak aprobetxatuta.

Zumarragan lur azpiko edukiontziak izango dituzten kale bakarrak izango dira Piedad eta Bidezar, momentuz. Bidezarren, bertan dagoen plazatxoan egin dituzte dagoeneko zaborra biltzeko erabiliko diren lur azpiko edukiontzientzako kutxak. Lau motatako zaborra bilduko da bertan, organikoa, papera, ontziak eta bidrioa.

Gainontzeko lanei dagokienez, lur zoruan baldosak aldatu dira Bidezarren estatuko fondoak emandako diru-laguntzari esker. Gainera pibotak jarri dira espaloian, kotxeek bertan aparkatu ez dezaten.

Piedad kalean ere bai

Piedad kalea ere eraberritze lanetan murgilduta dago. Zenbaki bakoitietan eginak dituzte dagoeneko saneamendu, ura, gasa eta argiztatze sarearen berrikuntzak. Berdina egingo dute orain zenbaki bikoitietan. Bertako lanak hasten direnean, kotxeak berriro ohiko bidetik bideratuko dituzte. Gainera, espaloia ere eraberrituko dute.

Eta lan hauek tarteko, hemen ere jarriko dituzte lur azpiko edukiontziak. Sei izango dira guztira. Bi zabor organikoa jasotzeko, bat ontzientzako, beste bat bidrioarentzako, beste bat papera jasotzeko eta azkena edukiontzi marroia izango da, laster martxan jarriko dena.