Igandean ospatuko da eguna mundu mailan, eta Urretxuko Udalak 'Hiruki Arrosa' jarriko du balkoian.
Datorren igandean gay, lesbiana eta
transexualen eskubideen nazioarteko eguna ospatuko da mundu osoan.
Euskal Herrian deialdia egin du Euskal Herriko Gay-Les Askapen
Mugimenduak (EHGAM), besteak beste, eta Urretxuko Udalak bat egin du
deialdi horrekin. Hala, igandean, hilak 28, Urretxuko udaletxeko
balkoian Hiruki Arrosa ikurra ipiniko dute.
Hiruki arrosa,
nazien garaikoa
Hiruki Arrosa-ren sinboloa naziek
kontzentrazio eremuetan homosexualak bereizteko erabili zuten . «Gaur
egun sarraski hura gogoratzeko eta oraindik bete gabe dauden gay,
lesbiana eta transexualen eskubideak aldarrikatzeko» erabiltzen
den sinboloa da Hiruki Arrosarena, Urretxuko Udalak bere egingo
duena.
Urrezko Hirukia eta Trapuzko Espartina
2009
Dagoeneko tradizioa da ekainaren 28etan EHGAMek Urrezko
Hirukia eta Trapuzko Espartina ematea. Ekimen honen helburua da
askapen sexualaren prozesuan nolabait lagundu duten pertsonak,
elkarte edo erakundeak saritzea, alde batetik, eta, bestetik, gay,
lesbiana eta transexualen eskubideak zapaldu edo mespretxatu
dituztenak agerian utzi eta, sinbolikoki bada ere, zigortzea.
Aurtengo sarituak:
- Urrezko Hirukia 2009: Laura Bugalho, aktibista transexuala -Transgaliza kolektiboko fundatzailea- eta sindikalista.
- Trapuzko Espartina 2009: Arantza Quiroga, Eusko Legebiltzarreko presidentea, PP eta Opus Dei-ko kidea. Katoliko amorratua eta familia tradizionalaren defendatzailea, bere izendapena jakin eta gutxira, publikoki adierazi zuen Aita santuarekin ados zegoela preserbagailuen aferan.
Argazkia: EGHAMek ekainaren 28rako atera duen kartela.
