Piedad kaleko lanak amaitzeko urbanizazio lanak baino ez dira falta. Hirukiko plaza itxuraz eraberritzeaz gainera, lehen zeuden irisgarritasun arazoak konponduko dituzte.

Zumarragako Udala Piedad kalean egiten ari den berrikuntza lana bi eremutan bana daitezke. Kalearen gehiena hartzen duten berrikuntzak Espainiako Gobernuaren Tokiko Inbertsioetarako Funtsaren laguntzekin lotuta daude, eta amaitzeko epea abendua zen. Lanak ez zituzten ordurako bukatu; epea luzatzea eskatu eta onartu ondoren urbanizazio lanak besterik ez dira falta.

Piedad kalean autoentzako tokia mugatu egin dute eta oinezkoentzat espaloia zabaldu. Alkateak aurreratu du udaltzainen presentzia handia izango dela Piedad kalean, kotxeek espaloi gainean aparkatzea ekiditeko.

Hirukiko plaza

Hirukiko plazako eskaileraraino iristen da berrikuntza E Planarekin. Hortik aurrerakoa Eusko Jaurlaritzako Merkagune programaren bitartez finantzatuko du Udalak. Alderdi estetikoaz gain, Hirukiko plazan irisgarritasun arazoak zeuden. Hori saihesteko arrapalak egingo dituzte. Gainera, Iburreta tabernaren kanpoaldea aldatu egingo dute, eta ostalaritza establezimendu horrek terraza jartzeko aukera izango du, horretarako egokituko duten espazio batean.