Urretxuarrak «berdintasunerako benetako politikak» bultza daitezen eskatu zuen saria jasotzeko ekitaldian. Itziar Oñatibiak atzo jaso zuen Zumarragako udaletxean Xera Saria. Emakume eta gizonen arteko berdintasunerako aldarrikapenaren beharra eta gaurkotasuna agerian jartzeko balio izan zuen ekitaldiak, besteak beste, eta saridunak eskatu zuen bezala, «helburu honetarako benetako politikak bultzatzeko» aukera izan zen.

Bertan hainbat herritarrez gain, Urretxu-Zumarragako udal ordezkariak izan diren, Mairi eta Eraldatzen elkarteko kideak, eta batez ere, Urretxun jaio zen Emakumearen I. Kontseiluan parte hartu zuten zenbait lagun.

Saria Oñatibiak berak jaso bazuen ere, bertan aritu ziren emakumeena zela adierazi zuen, eskerrak ematerakoan; «haiek jarri baitzuten ilusioa, indarra eta lana berdintasun plana aurrera ateratzeko. Nik atea ireki besterik ez nuen egin».

Era berean, maila pertsonalean emandako laguntza eskertu nahi izan zien. Honez gain, «isilean gehien sufritzen duten emakumeak eta mota guztietako indarkeria jasaten dutenak» gogora ekarri zituen. «Berdintasunerako bidea luzea eta zaila da» esan zuen, baina merezi duela azpimarratu.

Elkarteenganako babesa

Saridunak berdintasunaren alde lanean dauden elkarteenganako babesa eta bultzada eskatu zien udalei. Ekitaldian Zumarragako Musika Bandaren talde batek musika jarri zuen, Lander Zurdoren zuzendaritzapean, eta Rakel Ropero eta Marian Ostiza, Zumarraga eta Urretxuko berdintasun zinegotzi ak eta Anton Arbulu eta Iñaki Zabalaren hitzak ere izan ziren. Guztiek zorionak eta eskerrak eman zizkioten saridunari egindako lanagatik eta kontseiluak abian jarritako ibilbideari jarraikortasuna emateko konpromezua azaldu zuten.

Atzokoa Xera sariaren hirugarren edizioa izan zen eta aurtengo berritasuna, sariduna aukeratzeko Urretxu eta Zumarragako herritarren parte-hartzea eskatu dela izan da.