Urola Garaia Udal Elkarteak eskualdeko merkataritza guneetan euskararen erabilera sustatzeko planarekin bat egin duten merkatari talde berriak aurkeztu ditu eta 2007an aritutakoei eskerrak eman dizkie. Beraietako batzuekin hitz egin dugu egindako lanari buruz.

 

Ekitaldia Zelai Arizti kultur etxean izan zen abendua hasieran. Bertan, Beatriz Perez Urretxu eta Zumarragako Bitartean merkatari elkarteko ordezkariak, Olatz Elustondo Zumarragako Udaleko Euskara teknikariak eta Aritz Urien Emun enpresako hizkuntza normalizazio teknikariak parte hartu zuten.

Urienek eta Elustondok 2007an egin diren ekintzen laburpena eskaini zuten eta 2008rako lan ildoa aurkeztu zuten. Aurten zenbait merkatari talde osatu dira eta horiek euskarari eta merkataritzari buruzko solasaldiak izan dituzte. Bestalde, kartelak egiteko ikastaroak eskaini dira eta inprentetan euskararen erabilera sustatu da. Teknikariak gustura daude merkatarien parte hartze eta prestutasunarekin. Hori dela eta, eskerrak eman zizkieten.

Urola Garaian 150 denda inguru dira zerbitzua euskaraz emateko gai direnak eta teknikariek guztietara heldu nahi dute. Merkataritza guneetan euskararen erabilera sustatzeko planarekin bat egin duten dendari gehiago lortu dituzte 2008rako. Legazpin Alberdi jantzi-dendak, Andere umeen jantzi-dendak, Auzmendi iturgintzak, F-8 argazki-dendak, Hariz-Hari jostun-dendak, Iñaki zapata-dendak, Laga garbiketa-dendak, Lanbroa belar-dendak, Txomin iturgintzak, Txomin Zubeldia edari-dendak eta Ogi Berri okindegiak bat egin dute egitasmoarekin.

Urretxu eta Zumarragan Agirre eta Aranburu harategiek, Etxaniz arma-dendak, Nekotz albaitaritza, Pertxingoa jantzi-dendak, Urdangarin burdindegiak eta Ureder estetika zentroak parte hartuko dute 2008ko egitasmoetan.
Aipatutako hauek guztiek solasaldiak izango dituzte eta aurten abian jarri diren gainontzeko ekimenak ere mantenduko dira. Bestalde, supermerkatu handien eta frankizien konpromisoa lortzeko lan egingo da. Gainera, mintzalaguna ekimena abian jarri nahi da euskaraz hitz egiteko erraztasunik ez duten merkatarientzat.
Euren parte hartzea ezinbestekoa denez eta oso ondo erantzuten ari direnez, 2007ko egitasmoetan parte hartu dutenei errekonozimendua eskaini zitzaien ekitaldia amaitzeko. Urretxun Argizti optikak, Berriki jantzi-dendak, Imajin eta Xarmanki estetika zentroek eta Kuttun mertzeriak jaso zuten esker ona. Zumarragakoen artean, Garbiñe tindategiak, Iraeta estankoak, Izagirre janari-dendak, Kizkitza oihal-dendak, Kux-Kux umeentzako jantzi-dendak, Lanbroa belar-dendak, Salegi harategiak eta Urki liburu-dendak jaso zuten errekonozimendua.
Bukatzeko, Legazpin Algar elektrizitateak, Alkain elektronikak, Apatxo liburu-dendak, Itziar belar-dendak, Kixka osagarri-dendak, Korosti kafe-dendak, Lasandu para-farmaziak, Kale Nagusiko loteria-dendak, Mirentxu mertzeriak eta Poxpolin umeentzako jantzi-dendak jaso dute esker ona.