Mendiluze, Egaña eta Arzallus arituko dira, besteak beste, Santa Lutzi bezperan eta bihar jarriko dira salgai sarrerak.


Urtero Santa Lutzi feriaren baitan egin ohi den moduan, Luzio Gabiria
zena omendu asmoz antolatu den bertso jaialdia izango da datorren
asteazkenean, Zelai Arizti aretoan, gaueko hamarretan. Hogeigarren
edizioa beteko du aurten jaialdiak, eta, urtero bezala, puntako
bertsolari taldea izango da Zumarragan kantuan, Santa Lutzi egunaren
bezpera girotzen. Aurtengoan, Andoni Egaña, Aitor Mendiluze, Amets
Arzallus, Aitor Sarriegi eta Uxue Alberdi bertsolariak bertatik bertara
ikusi eta entzuteko aukera izango dute Zelai Ariztira gerturatzen diren
bertsozaleek.




Sarrerak aldez aurretik erosteko bihar eta etzi izango da
aukera aretoko leihatilan, 19:30etatik 20:30era. Ekitaldi egunean
bertan oraindik sarrerarik geratuko balitz saioa hasi baino ordubete
lehenago jarriko dira salgai. Sarreren prezioa 6 eurokoa izango da.



Bertsolari ezagunak




Bertso Eskolako kide diren antolatzaileen arabera «aurkezpen
handiegiren beharrik ez duten bertsolariak dira. Andoni Egaña
zarauztarrak Euskal Herriko txapelketa nagusia irabazi du azken lau
ediziotan, eta etengabe plazarik plaza dabilen bertsolari nekaezina da.
Asko dira bere bertsokera berdingabea imitatzen saiatu diren
bertsolariak, baina egun, hanka sartzeko beldurrik gabe esan daiteke
Andoni Egañaren bertsokera bakarra dela».



Txapeldunak, lau bertsolari gazte izango ditu alboan.
Antolatzaileen iritziz «Aitor Mendiluze andoaindarra eta Aitor Sarriegi
beasaindarra dira, agian, uneotan sasoikoen dauden bertsolariak.
Ordizian jokatutako Gipuzkoako txapelketako finalerdian aurreneko
postuak lortu zituzten biek, eta horrenbestez hilaren 16an Donostiako
Ilunbe zezen plazan jokatuko den finalean kantatzeko txartela. Finala
baino lau egun lehenago eurak Zumarragan kantuan entzuteko aukera
izango dugu».



Amets Arzallus, bertso ibilbide emankorra egin du dagoeneko,
adinez gaztea izanagatik. «Azken txapelketa nagusian finalean kantatu
zuen, eta egun Euskal Herrian plaza gehien egiten duten bertsolarien
artean kokatu behar dugu hendaiarra. Sekulako erraztasuna du bertsoak
osatzeko».




Uxue Alberdi bertsolari elgoibartarra da taldeko bosgarrena
eta Zumarragako entzulearentzat agian ezezagunena den bertsolaria. «Bat
bateko bertsolaritzan orain gutxi lehen urratsak emana, ibilbide
laburra egin du gaur arte, baina arrastoa utzi duena. Bertsolari
izateaz gain idazle ere bada, aurtengo otsailean "Aulki bat elurretan"
bere lehen eleberria argitaratu du idazle gazteei zuzenduriko Igartza
literatur sorkuntzarako beka jaso ostean». Bertso eskolako kideen
arabera, Gipuzkoako txapelketako finalera heltzea lortu ez badu ere,
«lan txundigarria egin du, literatur ukituak dauzkan bere bertsokera
berezi eta samurraren laguntzaz».



Zozketa eta urteurrena




Iaz egin zen moduan, aretorako sarreran zozketa txartel bana
emango zaio entzule bakoitzari eta saioaren amaieran gabonetako saski
bat zozketatuko da bertaratutako guztien artean. Era berean, aurten
Luzio Gabiriaren omenez ospatzen den jaialdiak hogeigarren ekinaldia
betetzen duenez, saioan zehar modu berezian gogoratuko da bere irudia.
Antolatzaileek sorpresaren bat edo beste iragarri dute